Kada adlaw kapin 90-120 ka tonelada nga basura ang ginakolekta sang syudad kag ginahaboy sa Sanitary Landfill. Halos tanan nakabalo nga wala sang insakto nga waste segregation nga nagakatabo sa paghaboy sang basura. Kinahanglan may himuon kita agud malikawan ang madasig nga pagkapuno sang landfill.
Gin-meeting ko ang Technical Working Group naton sa Solid Waste Management para sa mga programa naton sa solid waste management. Para mangin madinalag-on ang aton kampanya para sa matinlo nga syudad, kinahanglan ko gid ang inyo kooperasyon. Ang simple nga pagbahin-bahin sang basura sa inyo puluy-an daku na ina nga bulig.
-MAYOR RONNIE DADIVAS
Daku gid nga bulig ang insakto nga waste segregation sa tagsa ka puluy-an. Paagi sa kooperasyon sang tanan, mapalawig naton ang paggamit sang landfill kag mapabilin nga matinlo ang syudad.