Nagtambong ako subong nga hapon sa isa ka meeting via zoom kaupod ang mga opisyales sang Department of ENERGY (DOE), National Grid Corporation of tge Philippines (NGCP), mga Gobernador kag mga Mayors sa Panay Island may kaangtanan sa madugay kag masami brownout nga ginaantos subong sa bilog nga Rehiyon 6.
Sa bahin sang Local Government Unit, aton ginpaabot ang sentimyento sang tanan naton nga pumoluyo kag gin-usisa sa mga ahensya nga concerned kon ano ang ila mangin IMMEDIATE SOLUTION sini nga problema kag kon san-o mabalik sa normal ang suplay sang kuryenti sa syudad.
Sunu sa NGCP, ang sitwasyon subong tuga sang pagsaka sang demand sa suplay sang kuryenti sang mga konsumidor bangud sa mainit nga panahon. Ila ginsiling nga masarangan nila i-produce ang kinahanglan nga suplay apang indi ini masarangan deliver sang transmission lines.
Aton ginpaabot sa ila ang kinahanglanon sa madasig kag abanse nga solusyon sini nga problema nga nakaapekto indi lang sa mga pamalay kundi sa negosyo kag ekonomiya naton.
Sunu sa NGCP padayon na ang pagsolusyon nila sa problema. Kabahin sa ila solusyon amo ang pagpatigayon sang adjustments ukon paglimit sa transmission sang power supply kag pagdugang sang transmission lines nga ginalauman matapos sa bulan pa sang Agosto.
Kalakip sa mga nagtambong sanday DOE Undersecretary Rowena Cristina Guevara, DOE USEC Wimpy Fuentebella, NEDA OIC RD Arecio Casing, NGCP Deputy Department Head Reynaldo Abadilla kag Chairman Mr. Anthony Alameda sang NGCP.
-MAYOR RONNIE DADIVAS