Ang aton Meat Inspection Team nakakumpiskar naman sang HOT MEAT nga gintuyo pasulod sa TATC. Na-monitor sang Market Security Personnel naton sa merkado nga wala sang stamp halin sa Slaughter House ang karne sang Karabaw.
Base sa report nga aton nabaton, gintuyo pa sang tag-iya nga ipakatay sa Slaughter House ang karabaw apang wala ini ginpahanugutan nga makasulod bangud naobserbahan sang meat Inspector nga maluya ang lawas kag ginahapo ang sapat kag posible pa nga maapektuhan ang iban pa nga yara sa Slaughter. Apang ginpakatay gali ini sang tag-iya sa guwa kag gindala sa merkado. Pagkatapos madakpan gilayon nga ginpalubong ang mga nakumpiskar nga karne.
Sa aton mga negosyante, naintindihan naton nga ini ang inyo pangabuy-anan apang kinahanglan ninyo magsunod sa pagsulundan agud indi kita makaperwisyo sa aton mga kasimanwa. Pinangabudlayan nila ang kada sentimo nga ginabakal sa inyo, nagakadapat lang nga maayo nga klase kag safe ang produkto nga ibaligya naton sa ila.
Sa aton mga bumalakal saligan ninyo nga mangin mas maid-id pa ang aton mga inspectors kag TATC Personnel sa pagbantay sang mga ginapasulod nga karne kag iban pa nga produkto agud maamligan ang inyo interes kag masigurado ang tampad nga pagbaligyaanay sa aton merkado.
