Kahapon, isa ka katapo sang City Ordinance and Regulations Enforcement Unit (CORE) ang nakuhaan sang video kag litrato sang netizen nga nagalapas sa No Helmet No Ride Policy bangud nagaangkas ini sa motorsiklo nga wala sang suksok nga helmet.
Ini nga miyembro sang CORE na-identify na kag gilayon nga ginpatawag subong nga aga sang pamunuan sang CORE Unit upod sanday Councilor JP Arcenas kag Councilor Bordoy Viterbo agud mapapanaugan sang penalidad. Magluwas sa pagbayad sang multa, siya magapangatubang sang disciplinary action.
Ang aton syudad seryoso sa pagpatuman sini nga ordinansa. WALA SANG PINILIAN.
Sa tanan nga katapo sang CORE, kabay nga ipabilin naton ang disiplina sa aton kaugalingon kag magserbi nga maayo nga ehemplo sa aton kasimanwa.
Sa aton mga motorista nga indi malikawan nga nagareklamo pa, kabay inyo mabinagbinag nga ini nga ordinansa ginhimu para sa kaluwasan kag proteksyon ninyo kag indi agud pabudlayan kamo.
Madamo na ang nagtaliwan bangud sa aksidente sa motorsiklo, indi ta na pagdugangan.
Disiplina kag Kooperasyon sang tanan ang aton kinahanglan para sa kaayuhan sang Roxas City.
