May isa ka Super Typhoon nga ginapanan-aw nga magasulod sa Pilipinas kag ginhingagadlan, ST Betty (Mawar).
Base sa forecast sang PAGASA posible ini magsulod sa Philippine Area of Responsibility (PAR) sa Biyernes sang gab-i tubtob Sabado sang magaaga.
Apisar nga malayo sa Roxas City kag ginalantaw indi direkta mag-igo ang bagyo sa Western Visayas , makaeksperyensya gihapon kita sang mabaskog nga ulan sa sulod sang tatlo ka adlaw nga posible magdala sang pagbaha kag landslide.
Bangud sini, nag-convene subong ang City Disaster Risk Reduction and Management Council para sa isa ka Emergency Meeting sa pagpanguna ni Vice Mayor Inday Teresa Almalbis nga nagrepresentar sa akon kaupod ang mga Barangay Kapitanes kag ila representante agud temprano kita makapanginlaman kag preparahan ang posible mangin epekto sang ST Betty.
Bilang First Responders ginapapreparar na naton ang mga Barangay Officials sang kinahanglanon sa evacuation center partikular sang mga pagkaon kag non-food items subongman pagpatigayon na sang clearing operation kag pag-trim sang mga puno sang kahoy agud masiguro nga mahupos sudlon sang emergency responders ang mga dalanon.
Nakaalerto 24/7 ang aton CDRRMO sa pagbantay sang dalagan sang panahon, CSWD, CITY HEALTH OFFICE, CITY ENGINEERS OFFICE kag iban pa nga FRONTLINE SERVICE PROVIDERS sa pagsabat sa inyo pagpanawag kag gilayon nga pagresponde sa kinahanglanon sang Barangay.
Preparado ang City Government sa pag-augment sa dugang nga kinahanglanon kaangay sang food packs, pagresponde sa mga health and emergency concerns sang mga apektado nga barangay kag mga apektado nga pamilya/evacuees.
Sa aton mga kasimanwa, ginhingyu gid namon ang inyo bulig kag kooperasyon sa pagsunod sa direktiba sang syudad kag Barangay kon magpatigayon kita sang PRE-EMPTIVE EVACUATION para sa kaluwasan sang tanan.
