Isa sa mga lihuk naton agud preparahan kag mapahagan-hagan ang epekto sang baha sa Roxas City labi na subong nga tingulan ang pagpatigayon sang dredging sa mga sapa ukon guluwaan sang tubig pakadto sa Panay River.
Sang nagligad nga Sabado gin-umpisahan na naton ang pagpakutkot sa Sitio Sapa sa Barangay Bolo. Para sa ihibalo sang kadam-an, ang Sitio Sapa isa sa mga mayor nga guluwaan gid sang tubig halin sa kalapit nga barangay pakadto sa Panay River. Aton naobserbahan nga nagkipot kag manabaw na gid ini bangud sa mga bun-od nga nagtipon gani mahinay ang pag-agi kag paghubas sang tubig-baha sa mga apektado nga lugar.