Kita nagapangatubang sa pagpanghangkat sa pagpadayon sang aton Bugas para sa taga-Roxas nga Food Security Program bangud sa bag-o nga direktiba sang NFA nga nagasiling nga indi na sila makabaligya sang bugas para sa aton programa. Magabaligya lang sila sang suplay sang bugas sa tion sang kalamidad ukon emerhensya.
Enero 20 pa sang ulihi kita nakapatigayon sang distribusyon. Gani aton gid ginapangitaan sang paagi nga masolusyunan ang problema kag magpadayon ang distribusyon.
Sa amon pangunseho isa gid lang ang nakita namon nga solusyon kag ini amo ang pagkuha sang bugas sa pribado nga source. Magapatigayon kita sang bidding sa mga interesado nga bidder nga may kapasidad nga makahatag sa aton sang pinakabarato kag kalidad nga bugas.
INDI AKO MAGPASUGOT NGA MAG-UNTAT ANG PAGPANAGTAG SANG BUGAS. HIMUON KO ANG TANAN AGUD MAGPADAYON ANG PROGRAMA tungod nahibaluan kag nabatyagan ko nga kinahanglan ini sang aton pumoluyo. Ang Bugas para sa taga Roxas nagapamag-an sa guinapas-an sang aton kasimanwa.
-MAYOR RONNIE DADIVAS