AgatonPH: Mayor thanks Rescuers and Frontliners for sacrifices during Typhoon

Akon hugot nga ginapasalamatan ang aton mga CDRRMO-RCert, Medical Frontliners, CSWDO, Brgy Officials, BHWs/BSWs, Tanod, LGU Personnel, CBAO, BFP, Coast Guard, PNP, Red Cross kag iban pa nga VOLUNTEER Rescuers nga wala sang pag pang-duha-duha nga nagsakripisyo sang ila kabuhi agud masalbar ang aton kasimanwa nga nagpangayo sang bulig halin kahapon sang aga asta sa tion nga indi na nila masarangan nga masulod ang mga lugar nga nagtaas na ang tubig labi na sa tion sang kagab-ihon.

Ang aton Frontliners kag Rescuers INDI mga Superhuman. May kaugalingon nga mga pamilya nga ginbahaan man kag nagakinahanglan man kuntani sang ila atensyon apang ila anay ginpaiway. Sila nagbatyag man sang kakapoy kag gutom apang ginpili nila nga maglusong sa madalum nga baha kag mag-resgo masiguro lang ang kaluwasan sang kadamuan.

Nakit-an ko ang 100% nila nga pagtinguha lakip na ang pagkumbinsi sa mga pumoluyo sa danger areas nga mag-evacuate na samtang pwede pa maagyan ang mga dalanon kag mapawa pa. Indi pa tapos ang laban. Nag-untat na ang ulan pero nagataas pa ang tubig-baha sa pila ka lugar. Madamo pa sang dapat trabahuon kag bululigan.

Apang, gusto ko na ipaabot sa ila nga wala iban nga balatyagon sa akon taguipusuon kundi pagpasalamat lang sa sakripisyo nila. Kung wala sa ila, madamo gid nga kabuhi ang nabutang sa alang-alang.

Diyos na ang magabalos sa inyo sakripisyo.

-MAYOR RONNIE DADIVAS

0 Comments

There are no comments yet

Leave a comment

Your email address will not be published. Required fields are marked *