Ang team sang City Veterinarians Office kag City Agricultures Office nagpadulong sa Barangay Cogon para mag-inspeksyon matapos makabaton sang report halin sa mga opisyales may kaangtanan sa pagkamatay kag pagmasakit sang pila ka ginahuptan nga baboy sang isa nila ka residente nga GINASUSPETSAHAN may African Swine Fever.
Sunu sa tag-iya nagdesisyon ini nga gilayon na nga ipalubong ang mga napatay nga baboy agud indi na maglapta pa. Gilayon man nga ginapadisinfect sang City Vet kag City Agricultures Office ang palibot sang iya tangkal gamit ang ila ginhatag nga mga disinfectant. Ang mga nagkalabilin nga baboy igapaidalum sa test agud makumpirmar kon ini may ASF gid man.
Sa pinakaulihi nga monitoring sang aton City Agricultures Office may 39 na ka baboy nga napatay sa Cogon bangud sa sakit halin sa duha ka hog raisers nga nagpasalig nga wala nila ginpaguwa sa barangay ang ila baboy.
Sa kabilugan may 66 ka SUSPECTED ASF CASES ang Roxas City nga narekord sa maid-id nga monitoring kag reporting sa magkalapit nga barangay sang Cogon, Dumolog, Tanza kag Banica.
Kaangut sini hugot naton nga ginmando ang pag-istrikto pa gid sang Animal Checkpoint sa Dumolog kag pagdumili na sa pagpaguwa sang baboy sa Cogon.
Ginapangabay man naton sa pumoluyo nga gilayon nga magreport sa barangay kon nagamasakit ang ila baboy agud malikawan nga maglapta pa ini sa iban nga barangay.
Magtawag o mag-text sa masunod nga numero:
- TNT: 09103815386 / 09305851747
- Globe: 09665031767
