Gintugyan subong nga aga sang National Housing Authority ang bulig sa 14 ka mga biktima sang sunog sa Roxas City pinaagi sa ila Emergency Housing Assistance Program (EHAP).

Ang mga benepesaryo ginlakipan sang 8 ka fire victims sa Cagay, 3 sa Punta Cogon, 1 sa Libas, 1 sa Dinginan kag 1 ka taga Barangay XI.

12 sa ila ang totally damaged ang puluy – an nga nagbaton sang tig-30,000 pesos nga bulig kag 2 ang partially damaged houses nga may tig-10,000 nga bulig – pinansyal.

Personal ini nga gintugyan sa ila ni Engr. Rizalino G. Cabahug, NHA Region VI Regional Manager kaupod si Atty. John Leo Solinap Chief Corporate Attorney /Acting Division Manager, NHA Region VI, Ms. Josephine Bayoneta kag iban pa nga katapo sang NHA. Upod man naton sa distribusyon si Councilor JP Arcenas kag OIC-CSWDO Percy Cordova.

Ako nagapasalamat gid sa NHA sa pagtinguha nga mabuligan pinaagi sini nga programa ang nagakinahanglan nga pumoluyo sang syudad.

Sila nangin partner naton sa nakaligad nga 4 ka tuig sang aton administrasyon. Ang ila presensya sa tion sang kalamidad pamatuod nga kon nagabuligay ang gobierno lokal kag nasyunal mabatyagan sang pumoluyo nga ara ang gobierno nga nagaalalay agud mapamag-an ang problema nga nagaabot.

-MAYOR RONNIE DADIVAS

Leave a Reply

Your email address will not be published. Required fields are marked *