Sa una nga ika-100 ka adlaw sang pagpangalagad ni Governor Fredenil “Oto” Castro bilang Gobernador sang Capiz personal ko siya nga ginbisita sa kapitolyo probinsyal agud ipaabot ang pagpanginbulahan kag nagapadayon naton nga suporta sa iya administrasyon.
Kita nahatagan man kahigayunan nga mapamatian ang iya pagpatpat sang sang iya hinimuan kag sang mga nagabug-os sa gobierno probinsyal sa nakaligad nga 100 ka adlaw para sa benepisyo sang Capiznon sa atubang sang mga katapo sang Sangguniang Panlalawigan.
Kalakip diri ang pagpakaayo sang nawong sang kapitolyo kag sang serbisyo sa pumoluyo kaangay sang madasig nga paghatag sang burial kag hospitalization assistance, educational assistance pinaagi sa scholarship program, pagpakaayo sang health services sa mga gobierno nga ospital, pagpadayon sang konstruksyon sang RMPH sa Lanot, pagpahuman sang mga dalanon sa pila ka banwa kag iban pa nga proyekto. Iya man gin-anunsyar ang mga prayoridad nga programa sang iya administrasyon nga nakalinyada ipatuman subong nga tuig kag sa palaabuton.
