PaengPH: LEPTOSPIROSIS ALERT

Maga tatlo ka adlaw na nga lubog sa tubig-baha ang pila ka kabarangayan sa Roxas City. Sa akon paglibot akon nakita ang madamo nga pumoluyo nga indi gid malikawan ang pag-ubog sa mahigko nga tubig kag ang iban sa ila may mga pilas pa. Isa sa ginakabalak-an ko kag sang aton City Health Office amo ang pagtuhaw sang mga balatian nga mahimu makuha bangud sini kaangay sang LEPTOSPIROSIS, ang balatian nga makuha halin sa higko sang mga ilaga.

Amo ini ang rason sang paglibot sang CHO sa mga evacuation centers kag paghatag sang bulong agud malikawan ini nga balatian. Apang aminado kami nga indi tanan, maabot sang aton mga health workers gani hugot nga ginapanugyan sa inyo nga likawan gid ang paglangoy ukon paglusong sa kontaminado nga baha labi na kon may pilas sa lawas.

Magpa-check up gilayon sa doktor kon nakabatyag sang mga sintoma sang Leptospirosis.

0 Comments

There are no comments yet

Leave a comment

Your email address will not be published. Required fields are marked *