Puno sang paglaum ang 774 ka Informal Settler Families sang Barangay 5 kag 7 sa pagsaulog sang Groundbreaking sang Paglaum Rise.
Ini ang una nga tikang sa paghatag katumanan sa madugay na nga handum sang mga urban informal settler families kag sang gobierno sang syudad nga mahatagan sang disente kag dekalidad nga ilistaran ang mga ISF sang nasambit nga kabarangayan.
Magapuyo sila sa malapad, plastado, safe kag may kaugalingon nga parke kag open spaces nga lugar. Bangud onsite ang patigayunon nga proyekto, masiguro naton nga indi sila mapalayo sa ila pangabuy-anan sa sentro sang syudad.
Daku gid ang aton pagpasalamat sa madasig nga aksyon, bulig kag pag-ulingag sang Department of Human Settlements and Urban Development (DHSUD) sa Roxas City pinaagi sa pagpanikasog nanday Secretary Jose Rizalino “Jerry” L. Acuzar, Usec. Avelino Tolentino III, Usec Garry de Guzman, Asec Sharon Faith Paquiz, HDMF CEO Marilene C. Acosta, HDMF OIC-DCEO for Home Lending Operations Cluster Benjamin Felix, Director Mario Mallari -DHSUD National, DHSUD 6 Director Eva Marfilkag Usec. Avelino kaupod ang pamilya Viterbo kag Hernandez nga nagdonar sang ila propedad para sa madasig nga mahatagan katumanan ang Paglaum Rise 5-storey midrise vertical housing project.
Bangud sa ila dedikasyon kag sensiridad sa pagbulig sa Roxas City ginalauman naton nga sa sulod sang duha ka tuig mahuman na ang Paglaum Rise.
Salamat gid sa inyo pagsalig sini nga administrasyon kag pag-upod sa aton tinutuyo nga mahatagan sang mauswagon kag disente nga pangabuhi ang aton kasimanwa.
Sa ginpatigayon naton nga Groundbreaking kaina yara man ang iban pa nga opisyales sang DHSUD National kag Regional offices, Sangguniang Panlungsod Members sa pagpanguna ni Vice Mayor Inday Teresa Almalbis, Barangay Officials sang Barangay V kag VII kag sang aton mga partner agencies.
“Mga 30 years na kami gaistar diri. Grabe amon pag-antos kag kakulba nga basi madulaan kami ilistaran kay indi amon duta. Nalipay kami nga may gintanyag nga subong sini nga housing project ang gobyerno. Amo ni ang manggad nga mapanubli sang amon kabataan sa amon. Kon mag bagyo indi na kami mag-alsa-alsa. Benepisyo pa gid namon nga indi na kami pag-isaylo sa malayo nga lugar diri lang kami sa malapit sa amon pangabuy-anan. Salamat gid sa pag-panikasog nanday Sec. Acuzar kag iya mga kaupod, sa amon pinalangga nga Mayor Ronnie, sa pamilya Viterbo, kag Hernandez nga mga nag-donar sang ila nga duta para mapatindugan sang amon puluy-an, kag labi na gid kay Presidente Bongbong para sa iya nga programa nga Zero ISF 2028,” mensahe ni Manang Lety Gudoy, isa sa mga benepesaryo sang Paglaum Rise Project.