Subong nga adlaw, 900 ka rehistrado nga shellfish farmers kag nagabaligya sang mga talaba, tahong kag nanari-sari nga panginhason sa Barangay Barra, Dayao, Talon, Balijuagan, Cagay, Culajao, Baybay, Mongpong kag Punta Cogon ang nakabaton sang tig-2000 pesos nga ayuda halin sa pondo sang City Government kag talatapan ni Senator Bong Go pinaagi sa DSWD. Sila makabaton man sang food packs sa masunod nga mga inadlaw agud makapiyan-piyan sa kabudlay sang ila sitwasyon.
“Indi gid manami ang amon sitwasyon subong. Bangud sa red tide nadulaan kami pangabuy-anan. Kabudlay gid galing wala kita mahimu kay para man ini sa kaluwasan sang tanan. Gapasalamat gid kami kay Mayor Ronnie nga wala gid untat nga nagaalalay sa amon kinahanglanon,” mensahe ni Tatay Iniano, manug-sisi sang Talon.
Ginatos ka manugpanginhas sa Roxas City ang temporaryo nga nadulaan sang pangabuy-anan bangud sa pagbawal sang pag-harvest, pagbaligya kag pagkonsumo sang panginhason bangud sa Red Tide . Gintinguhaan naton nga mahatagan sila sang madasig nga ayuda agud mabatyagan nila nga sa tion sang ila kinahanglanon, wala naton sila ginapabay-an.