Aton na subong pormal nga guinbuksan ang kaugalingon nga Temporary Treatment and Management Facility sang Roxas City sa Hortus Botanicus. Ini ang sabat sang City Government sa kakulangan sang bed capacity sa mga nagagutok na nga ospital sa syudad kag probinsya.

Ang Roxas City TTMF, indi ospital kundi Tulay antes makatabok ang pasyenti sa ospital halin sa ila puluy-an. Diri temporaryo nga pagatatapon ang mga MILD TO MODERATE CoVid-19 PATIENTS nga TAGA-ROXAS CITY kag guin-refer sang mga ospital samtang sila nagahulat sang bakante sa ospital antes makapa-admit.

Ini may ara sang 16 rooms, kaugalingon nga doctors, nurses kag nursing aides nga magaatipan sa mga pasyenti 24/7. Kumpleto sa oxygen, oxygen concentrators, kag high flow cannula. May CCTV ang kada kwarto, wifi connection, aircon, intercom, kag iban pa nga kagamitan.

Paano makasulod sa TTMF?

Ang mga pasyenti nga may referral sang ospital ang makasulod sa TTMF. Indi pwede nga magdiretso. Kinahanglan mag-agi sa ospital ang CoVid-19 patient para sa initial assessment kag laboratory tests.

Ano ang i-provide sang syudad?

Libre nga iga-provide sang City Government ang akomodasyon halin sa kwarto tubtob sa Medical Staff kag Personnel. Wala diri madala ang laboratory costs kag balayran sa bulong nga kinahanglanon sang pasyenti bangud ini magahalin sa ospital nga nagpasulod sa ila.

“Luyag ko pasalamatan ang mga tawo sa likod sang pag-establisar sang TTMF. Halin sa Department of Health, City Health Office, Capiz Medical Society sa pagpanguna ni Dr. Pip Acepcion, Dr. Abundio Balgos sang The Health Centrum, Dr. Cristina Danac-Delfin, Dr. Rene Huinda, Dr. Jo-Anne Bisnar, Dr. Julius Arches, Dr. Jocelyn Mosquite kag iban pa nga mga doctor/stakeholders nga nagbulig sa aton plastar sang plano kag mga dapat trabahuon agud mahatag naton ang kinahanglan nga serbisyo sang pasyenti kag kabigon kita sang DOH nga Best TTMF in the Region.

Tinguhaan naton sa kutob sa masarangan, mahatagan sang pinakamaayo nga pag-atipan ang mga residente sang Roxas City nga nagpositibo sa CoVid-19 kag nagakinahanglan sang IMMEDIATE MEDICAL ATTENTION apang indi pa ma-admit bangud gutok ang ospital. Sa sini nga pamaagi makabulig kita nga malikawan ang paglala sang ila balatian.”

-MAYOR RONNIE DADIVAS

Leave a Reply

Your email address will not be published. Required fields are marked *