“Malimpyo kag libre nga tubig para sa ikaayong-lawas sang pamilya“
Mag-kapartner ang Gerry Roxas Foundation Inc. kag Roxas City Government sa paglunsar sang “Safer Water Makes Families Healthier“, isa ka Mobile Water Refilling and Distribution Program nga ginpatigayon sa Barangay San Jose.
Ang San Jose, Jumaguicjic, Liong, Cabugao kag Adlawan ang 5 ka barangay ang napili nga mangin una nga resipyenti sang libre kag safe imnon nga tubig nga igadul-ong mismo sa ila barangay.
Si Paolo Roxas, ang anak sang aton kasimanwa nga si anay DILG Secretary kag Senador Mar Roxas nangin kaupod naton sa launching sang programa nga makabulig labi na sa mga lapsag, mga Nanay kag bilog nga pamilya.
“Diri sa San Jose, madamo sa amon kasimaryo nagainum gihapon sang tubig halin sa ila sinag-ob sa bubon o bomba bisan indi safe tungod wala man sila sang ikasarang magbakal sa mga refilling station. Daku gid ang akon pasalamat kay paagi sini nga programa sang GRF kag City Government, masigurado namon nga malimpyo tubig ang imnon sang pamilya labi na sang mga kabataan. Libre pa!” Kapitan Albert Calipayan.
“Safe kag Healthy ang amon mga kabataan sa Jumaguicjic, indi na sila magmasakit kon mag-inum tubig kay ang ila imnon nakaagi na sa Mobile Filtration Unit. Salamat gid sa inyo pag-ulingag sa amon,” Kagawad Rizal Dichosa.
