Yuhom nga puno sang paglaum kag luha sang kalipay ang makita sa mata sang mga pamilya nga nasunugan bangud sa padayon nga pag-abot sang bulig para sa ila pagbangon.
Si Uswag Ilonggo Partylist Representative Congressman Jojo Ang nagkadto sa evacuation center agud personal nga ihatag ang bulig pinansyal sa mga biktima. Makabaton man sang burial assistance halin sa Uswag Ilonggo ang mga namatyan bangud sa sunog.
Nalipay ako nga paagi kay Cong. Jojo magahatag sang bulig pinansyal ang talatapan ni House Speaker Martin Romualdez. Si Senator Loren Legarda magahatag man sang bulig sa mga pamilya.
Ang Gerry Roxas Foundation nagpadala sang Water Filtration System kag ginatos nga Jollibee food packs pinaagi Kay Paolo Roxas. Sa iya personal nga kapasidad naghatag man siya sang bulig sa mga nasunugan.
Sa pihak sang aton naagyan, puno gihapon sang pagpasalamat ang akon tagipusuon bangud duha ka adlaw pagkatapos sang sunog amat-amat na naton nga nakita ang pagbangon sang Barangay 7. Matuod gid nga kon kita nagbuligay kag nagatuo sa Diyos, tanan nga pagtilaw aton malampuwasan. Wala sang imposible.
-MAYOR RONNIE DADIVAS
